فراغت دانش‌آموزان افغانستانی از مکتب سامانی در تاجیکستان
در حالی‌که دروازه‌های مکتب به‌روی دختران در افغانستان بسته است، شماری از دانش‌آموزان دختر و پسر افغانستانی، از مکتب «سامانی» از کشور تاجیکستان فارغ‌التحصیل شده‌اند.
محمد ظاهر اغبر سفیر و نماینده‌ی سیاسی افغانستان در تاجیکستان، صبح امروز، یک‌شنبه ۱۳ جوزا با نشر پیامی فراغت این دانش‌آموزان را به خانواده‌های شان و مردم افغانستان تبریک گفته است.
آقای اغبر هم‌چنین نگاشته است که باوجود چالش‌ها و مشکلات پی‌درپی، سفارت افغانستان مقیم تاجیکستان و اداره‌ی مکتب سامانی توانسته‌اند، موفقانه یک نسل جدید از دانش‌آموزان اعم دختر و پسر را به جامعه تقدیم نمایند و شرایط را برای ارتقای دانش‌آموزان صنف‌های اول الی یازد‌ه‌ام فراهم سازند.
سفیر افغانستان در کشور تاجیکستان در ادامه‌ی پیام‌اش نیز گفته است: «این فراغت در شرایطی که هنوز هم دروازه‌های مکتب در کشور عزیز ما به روی دختران ما بسته است، دستاوردی است نهایت با ارزش است. ما از خانواده‌های عزیز که ما را در راستای ارائه‌ی شرایط آموزشی کمک نموده‌اند، تشکر می‌کنیم».
گفتنی است که فراغت این دانش‌آموزان در مقر سفارت افغانستان در دوشنبه، برگزار شد وی اما در مورد تعداد این دانش‌آموزان چیزی نگفته است.
سفیر افغانستان در این کشور وعده‌ی بهبود کیفیت تعلیمی را در سال بعدی داده و هم‌چنین اعلام کورس‌های رایگان برای دانش آموزان علاقه‌مند در رشته‌های مختلف نیز برگزار می‌کنند.
این دانش‌آموزان در حالی از مکتب فارغ شدند که در افغانستانی نزدیک به سه سال می‌شود که دختران بالاتر از صنف ششم از رفتن به مکتب و حتی دانش‌آموزان دختر از دست‌رسی به مرکز‌های آموزشی خصوصی محروم‌اند.
ترتیب: لیدا بارز
